Shqipëria është padyshim një prej vendeve më të varfra të Europës përsa i përket nivelit të pagave, mirëqenies, ekonomisë.
Eurostat në një raport ku vlerësohen të ardhurat dhe konsumi në vendet e Bashkimit Europian gjatë vitit 2018, e rendit vendin tonë të fundit.
Shqipëria vlerësohet se ka të ardhurat sa 31% të mesatares së Bashkimit Europian, ndërsa konsumi rezulton minimal, i njëjtë me Bosnje Hercegovinën dhe më i ulëti në nivel europian.
Shqetësues është fakti se përtej të ardhurave edhe konsumi i shqiptarëve është më i ulëti krahasuar me vendet e Europës, çka tregon një mirëqenie të ulët të familjeve të cilat punojnë për mbijetesë.
Por konsumi më i ulët në Shqipëri është edhe nëse e krahasojmë me Bosnjen, çka nënkupton se jetesa në Shqipëri është më e shtrenjtë.
Vendi me të ardhurat më të larta në Ballkan rezulton Mali i Zi, ndjekur nga Serbia dhe Maqedonia në vend të dytë dhe të tretë.
Ndërkohë vendi me nivelin më të lartë të jetesës dhe mirëqenies në Bashkimin Europian rezulton të jetë Luksemburgu, shkruan ORA news. Të ardhurat dhe konsumi në këtë vend rezultojnë dy fish më të larta se mesatarja e Bashkimit Europian.
Pas Luksemburgut renditen Gjermania, Austria dhe Danimarka.
Nën mesataren e të ardhurave të Bashkimit Europian me rreth 10-20% renditen edhe Italia, Greqia, Qipro dhe Irlanda.
