E përzunë nga lokali se po fliste shqip, reagon futbollisti shqiptar

Futbollisti shqiptar që luan me përfaqësuesen e Maqedonisë ka kaluar një moment të sikletshëm me familjen e tij, teksa ishin duke drekuar në një restorant.

Dreka familjare e futbollistit në Prilep u shndërrua në një makth të vertetë dhe arsyeja është e turpshme.

Pronari i lokalit i ka nxjerrë jashtë, vetëm se ai dhe të afërmit e tij po flisnin mes tyre në gjuhën shqipe.

Kaq mjaftoi që kjo çështje të merrte përmasat e një skandali, ndërsa ka reaguar edhe vetë futbollisti i cili sqaroi për “Klan Macedonia Television” gjithë situatën e ndodhur.

Ai u shpreh:

Jam vërtet i irrituar me atë që ndodhi në Prilep. Shikoni, unë luaj për ekipin e kombëtares së Maqedonisë. Vij nga Anglia për të luajtur me gëzim për këtë ekip dhe ja çka përjetoj këtu. Derisa unë me të afërmit e mi kemi biseduar në gjuhën amtare, përndryshe unë nuk fsheh që jam shqiptar, një njeri erdhi dhe më tha të largohesha nga restoranti vetëm sepse dëgjoi gjuhën që komunikoja me familjen time. Unë me të vërtetë nuk kam koment, uroj që kjo mos t’i ndodhë askujt.”