Ditën e djeshme Skënder Gjinushi u zgjodh si kryetar i Akademisë së Shkencave. Zgjedhja e tij është shoqëruar me polemika të forta.
Ka pasur shumë pedagogë që janë shprehur hapur se Skënder Gjinushi nuk e meriton të jetë në krye të Akademisë së Shkencave.
Midis tyre renditet edhe pedagogia Dhurata Shehri. Në një postim në rrjetet sociale ajo ka publikuar CV-në Skënder Gjinushit, i cili tashmë është kryetar i Akademisë së Shkencave.
Shehi në postimin e saj shprehet se ka gabuar rëndë që ka menduar se kishte mbetur ndonjë akademik në Shqipëri.
Po ashtu, ajo shkruan se duhet lexuar CV-ja e Gjunishit për të parë nëse ai ka pasur ndonjë kontribut shkencor në vitet e fundit.
Postim i plotë:
Gabova rëndë ku mendova se kishte mbetur ende ndonjë akademik në Shqipëri! Duke nisur nga “kryetari”, CV-në e të cilit ju ftoj ta lexoni për te gjetur kontributin shkencor te 30 viteve të fundit! Skënder GJINUSHI (1949–). Matematikan, profesor, akademik. Lindi në Vlorë. Shkollën e mesme e kreu në Tiranë dhe përfundoi studimet e larta në Universitetin e Tiranës në vitin 1972. Gjatë viteve 1973–1977 kreu studimet pasuniversitare në Francë (Universiteti Pierre e Marie Curie, Paris VI) dhe fitoi titullin “Doktor” i ciklit të tretë në analizën funksionale. U emërua pedagog në katedrën e matematikës së specialitetit në Fakultetin e Shkencave Natyrore të Universitetit të Tiranës (1972). Skënder Gjinushi ka botuar tekstet “Bazat e topologjisë së përgjithshme” (1986), “Analiza funksionale” (1988), “Probleme të analizës funksionale (1992) dhe një varg artikujsh shkencorë në fushën e analizës funksionale. Në vitet 1987–1991 ka qenë deputet i Kuvendit Popullor dhe ministër i Arsimit. U aktivizua në proceset politike pluraliste dhe më 1991 u zgjodh kryetar i Partisë Socialdemokrate të Shqipërisë, funksion që vazhdon ta mbajë. Nga viti 1992 deputet në Kuvendin e Shqipërisë, kryetar i Kuvendit (1997–2001); zëvendëskryeministër e ministër i Punës dhe i Çështjeve Sociale (2001–2002).’’