Kroacia dhe Sllovenia i janë bashkuar një projekti që synon mbrojtjen e breshkave të ujit në Europë, të cilat janë drejt zhdukjes. Në projekt janë përfshirë Qipro, Malta, Italia dhe Greqia. Ky projekt synon të rrisë ndërgjegjësimin për të bërë më shumë kujdes në rritjen e tyre.
Fillimisht breshkat e ujit frekuentojnë ujërat e hapura dhe më pas lëvizin nëpër ujëra të cekëta, ku mund edhe të ushqehen. Përfaqësuesi i "Blue World", organizatës për ruajtjen e botës ujore, Drasko Holcer tha për BIRN se breshkat kanë nevojë për mbrojtje, në vendet ku ngrenë foletë, ku ushqehen dhe rriten.
Ai shtoi më tej se duhet ndaluar në mënyrë kategorike gjuetia e breshkave të uit në Adriatik. Kjo për shkak se ato do të tremben dhe nuk do të vijnë më për të lëshuar vezë. "Blue World" do të informojë gjithashtu peshkatarët, sesi të shmangin kapjen e tyre gabimisht në rrjetat e peshkimit.
Ata kanë shpikur gjithashtu një aplikacion me gjashtë gjuhë për sistemet android, i cili quhet "eTurtle". Ky aplikacion sipas Holcer, do të përdoret për tqë dërguar foto të breshkave në det, apo çelje vezësh. Breshkat kërcënohen nga një sërë faktorësh, që nga gjuetia,e deri te motorët e ujit të cilët mund t'i vrasin. Shumë prej tyre ngordhin pasi mund të hanë qese plastike.
Sipas Holcer, në Adriatik breshkat në të shumtën e rasteve ngatërrohen në rrjetat e peshkimit dhe nuk mbijetojnë më kur hidhen sërish në ujë. Deti mesdhe është habitat për breshkat e ujit dhe për breshkat e gjelbra, që kërcënohen nga zhdukja. Numri i tyre është ulur për shkak të shkatërrimit të habitatit dhe peshkimit.