Ndryshime të reja në kodin rrugor, çfarë do të ndodhë nëse nuk paguani siguracionin në kohë

Të mos kryesh sigurimin e detyrueshëm të mjetit në kohë do të gjobitesh 25 deri në 50 mijë lek të reja.

Ky është projekt-ligji që pritet të kalojë së shpejti në Kuvendin e Shqipërisë për t’u votëbesuar.

Në ndryshimet e reja të kodit rrugor, parashikohet edhe bllokimi i mjetit, deri në shlyerjen e detyrimeve.

Foto ilustruese

Në pikën 6 të nenit 92 thuhet:

Mospasja e mjetit me sigurimin e detyrueshëm në sektorin e transportit brenda 15 ditëve nga lindja e detyrimit për sigurim, sjell bllokimin e menjëhershëm të mjetit motorik nga organet e ligjzbatuese. Pronari i mjetit i cili kërkon të zhbllokojë mjetin, duhet të paguajë gjobën përkatëse dhe të lidhë siguracionin e detyrueshëm, dhe vetëm pas paraqitjes së mandat-pagesës së gjobës dhe policës së sigurimit mund të bëhet zhbllokimi i mjetit.

Gjobat nuk do të vendosen më nga punonjësit e policisë rrugore, por në mënyrë automatike dhe pronarit të automjetit gjoba do ti shkojë me postë në adresën e tij të banimit.

Të gjithë qytetarët që kanë një ose më shumë makina në ngarkim pavarësisht se lëvizin apo jo me makinën e tyre, dhe u ka kaluar afati 15 ditë pas skadimit të siguracionit të detyrueshëm (TPL) që nuk janë pajisur me siguracion të ri, do të gjobiten në mënyrë automatike dhe gjoba do t’u shkojë me postë tek shtëpia.