Prej disa ditësh grabitja që ndodhi në Rinas është kthyer në kryefjalën e mediave.
Kujtojmë këtu se fillimisht u tha se ishin grabitur 2 milion euro më pas ishte mediat ndërkombëtare ato që do të raportonin se ishin vjedhur 10 milion euro, derisa sa u verifikua se ishin vjedhur 6.5 milion euro.
Së fundmi grupi hetimor që po merret me këtë ngjarje ka treguar disa detaje të reja. Ata kanë dyshime se grabitësit ishin në djeni të disa tuneleve, brenda të cilave është përgatitur e gjithë grabitja në aeroport.
Po ashtu dyshohet se pas vrasjes së Admir Muratajt, autorët u larguan pikërisht nga këto tunele, për ekzistencën e të cilave policia u vu në djeni shumë kohë më vonë.
Mësohet se tunelet janë në afërsi të fshatit Drithas, ku policia gjeti të djegur edhe makinën me të cilën grabitësit u larguan nga Tapiza.
Gjithashtu hetuesit kanë dyshime se brenda këtyre tuneleve grabitësit ndanë paratë. Më pas ata kanë djegur rrobat dhe janë larguar pa as më të voglin shqetësim.
