Situata te Juventus nuk është më e qetë pas eleminimit nga Ajax në çerek finalet e Champions League. Me afrimin e Cristiano Ronaldos, tifozët bardhë e zinj prisnin të bënin kapërcimin e madh, atë të Champions League, trofe të cilin kanë 23 vite që e presin. Juventus nga ky sezon do të dalë vetëm me një superkupë dhe kampionatin e tetë radhazi, që është rekord absolut në Serie A.
Me humbjen ndaj Ajax, pozitat e Allegrit në krye të stolit bardh e zi janë lëkundur së tepërmi. Presidenti i Juventus Andrea Agnelli deklaroi për mediat se Allegri nuk lëviz, por gjërat mesa janë krejtësisht ndryshe. Mediat italiane dhe gazetarët pranë klubit bardh e zi, ka hedhur dyshime të forta se Allegri do ta mbyllë këtë vit me Juventusin.
Problemi i vetëm janë klubet që e kërkonin më parë si Real Madrid dhe Mancester United, të cilët i kanë zgjidhur problemet me stolin. Alternativat gjithësesi mbeten Chelsea i cili pritet të shkarkojë Sarrin, ndërsa opsion tjetër është edhe stoli i PSG me Tuchel, që është drejt largimit.
Gazetari Enzo Buchioni që është më pranë klubit bardh e zi, ka zbuluar se Agnelli ka nisur kontaktet për të sjellë në Torino Pep Guardiolën, por nuk përjashtohet as mundësia e rikthimit të Contes, për të vazhduar atë që ai nisi.
Gjithashtu disa lojtarë janë drejt largimit, ku në pole është Dybala, i cili ka humbur shkëlqimin dhe nuk po përshtatet me Cristiano Ronaldon. Të lëkunduar janë edhe pozitat e Douglas Costa apo Miralem Pjanic, të cilët mund të sakrifikohen për të sjellë yje në skuadër. Deri më tani këto janë thjesht zëra merkatoje dhe nuk ka asgjë të zyrtarizuar.