Ajaxi i Amsterdamit është padyshim surpriza e jashtëzakonshme e këtij edicioni në Champions League.
Pasi eliminuan Real Madridin në fazën e kaluar, të gjithë menduan se ishte thjesht një rastësi, por sot, holandezët kanë mrekulluar sërish botën e futbollit.
Ata kanë zhvilluar një ndeshje perfekte në ç'do aspekt në "Allianz Stadium" duke mundur Juventusin me rezultatin 1-2 dhe duke u kualifikuar për në gjysmëfinalet e Ligës së Kampionëve.
Van de Beek dhe De Ligt zhvlerësuan golin e Ronaldos duke i dhuruar Ajaxit fitoren e madhe.
Megjithatë përveç rezultatit, ajo që ra në sy ishte loja e jashtëzakonshme e holandezëve për 90 minuta duke e mbyllur Juventusin në gjysmëfushën e vet dhe duke e bombarduar me sulme.
Ronaldo dhe yjet e tjerë bardhezinj e kanë pasur të pamundur ndaj djemëve të rinj të Ajaxit të cilët janë aktualisht mrekullia e futbollit europian.
Juventusi eliminohet sërish nga ky kompeticion, madje me një zhgënjim të madh pasi me ardhjen e Ronaldos, tifozët prisnin që të ishin ata fituesit.
Por në futboll fiton gjithmonë ai që guxon... dhe sonte e bëri Ajaxi i Amsterdamit.