Në nëntor të vitit 2018, Ashley Huffman, 32-vjeçare, mori lajmin e hidhur se kishte kancer në gjirin e saj të majtë.
Ajo vendosi t’i nënshtrohej një testi gjenetik direkt pas diagnostikimit dhe mësoi se kishte një mutacion që i krijonte 70 për qind mundësi të zhvillimit të sëmundjes.
Pas kësaj, mjekët rekomanduan që edhe motra e saj binjake, Danielle Jones, t’i nënshtrohej të njëjtit test. Siç pritej, edhe motra binjake kishte të njëjtin mutacion.
Në shkurt të vitit 2019, Danielle vendosi të bënte një mamografi për të parë nëse ishte e shëndetshme dhe aty mori vesh që edhe ajo kishte kancer në gji.
Edhe pse u është dashur që të kalojnë nëpër trajtime të dhimbshme dhe operacione, motrat nga Miçigani u shprehën për Mail Online se janë mirënjohëse që patën njëra tjetrën në luftën kundër kancerit.