Nuk kanë të ndalur rastet e dhunës në futbollin shqipatar. Në Kavajë është ndërprerë sfida mes Besës dhe Bylisit.
Miqtë ishin duke udhëhequr sfidën me golin e Beji në pjesën e parë. Situata është tensionuar pasi në minutën e 75, gjyqtari Klajdi Kola ka ndëshkuar me karton të kuq mbrojtësin Danaj, duke i lënë vendasit me 10 vetë në fushë.
Në këtë moment, tifozët kavajas kanë goditur kryesorin me sende të forta. Situata ka dalë nga kontrolli dhe kanë ndërhyrë forcat e rendit.
Gjithashtu futbollistët e Besës kanë rrethuar gjyqtarin për ta mbrojtur nga sulmet. Mësohet se pre e dhunës ka rënë edhe virojtësi Denis Rexha, i cili është goditur pas shpine.
Skenat e dhunës në futboll janë shtuar së shumti kohët e fundit. Kujtojmë se pak ditë më parë, futbollisti i Tiranës Ngoo, u konfliktua me presidentin e Laçit, Pashk Laska, ndërsa Kamza u përjashtua nga kategoria superiore, për shkak të dhunës së tifozëve ndaj arbitrit.