Gjatë ditës së sotme Policia e Shtetit me anë të një njoftimi deklaroi se vrasja e Jurgen Kurtit ishte zbardhur. Kujtojmë këtu se Kurti u vra me datë 18 mars 2019, në rrugën “Zef Jubani” në Tiranë.
Për vrasjen e tij janë arrestuar tre persona dhe është shpallur në kërkim një i katërt. Të arrestuarit janë Elsi Levendi, Olsi Qalliaj dhe Alesio Berberi.
Olsi Qalliaj është 22 vjeç. Ai ka lindur në qytetin e Patosit dhe jeton po në këtë qytet. Në rrjet po qarkullojnë disa foto të të riut, në të cilat shikohet se ai bënte një jetë luksoze.
Edhe pse ai është 22 vjeç ka bërë mjaft udhëtime në Europë, nget makina të shtrenjta, por edhe një jaht.
E ditur u bë se të tre personat e përmendur më lart janë arrestuar pasditen e djeshëme në Tiranë. Gjithashtu e ditur është bërë se asnjëri prej tyre nuk i ka pranuar akuzat.
Gjatë kontrollit në banesat e tyre policia gjeti dhe sekuestroi një automjet që u ka shërbyer autorëve për t'u larguar nga vendi i ngjarjes, si dhe dy makina të tjera luksoze.
Po ashtu janë gjetur edhe një armë zjarri “Pistoletë TT”, fishekë luftarakë, një sasi prej 2470 euro e lekë shqiptare, 13 aparate celularë, si dhe një sasi e vogël lënde narkotike.
Sipas policisë tre të rinjtë e kanë ndjekur për disa ditë me radhë Kurtin dhe janë kapur nga kamerat e sigurisë duke udhëtuar me mjetin “Benz” që u përdor edhe ditën e vrasjes.