Kryeministrja e Serbisë, Ana Bërnabiq pas përfundimit të mbledhjes së Këshillit për Siguri Kombëtare, ka thënë se vendimi i Kosovës për dialogun (Platforma) është në “kundërshtim me mendjen e shëndoshë”, përcjell gazeta e Beogradit “Veçernje Novosti”.
"Miratimi i Platformës është në kundërshtim me mendjen e shëndoshë. Reagimi ynë do të jetë i matur”, citohet të ketë thënë Bërnabiq pas përfundimit të mbledhjes që e kishte thirrur Vuçiq.
“Goditja e parë ka qenë mosrespektimi i Marrëveshjes së Brukselit nga Kosova. Janë bërë 2.149 ditë qëkur është nënshkruar e nuk është realizuar asgjë nga ajo. Nuk ka asgjë nga krijimi i Asociacionit të Komunave serbe (AKS). E AKS ka qenë kurrizi i Marrëveshjes së Brukselit”, ka thënë ajo dhe ka shtuar se kjo ka qenë goditja e parë e Kosovës .
“Goditja e dytë ka qenë vënia e taksës e cila për shkak të reagimit të butë të vendeve perëndimore është ngritur në 100 për qind. Kosova i ka dërguar mesazh të qartë SHBA-së se nuk do t’i heqë taksat”, ka deklaruar Bërnabiq.
Goditja e tretë, ka thënë kryeministrja serbe, ka qenë miratimi i Platformës së Kosovës për dialog.
