Gjykata e Apelit në Athinë ka shqyrtuar sot çështjen e shqiptarit Nikolin Margjokaj. Shkodrani ishte dënuar më parë nga Shkalla e parë me burgim të përjetshëm, për dy vrasje. Sipas mediave greke, trupi gjykues ka hedhur poshtë kërkesën për kryerjen e analizës së ADN-së, të kërkuar nga pala mbrojtëse. Kjo e fundit nuk është e bindur për fajësinë e Margjokaj dhe sipas tyre vendimi nuk është bazuar në prova të mjaftueshme.
Pala mbrojtëse është shprehur se provat e paraqitura para gjykatës janë të rreme. Personat që dëshmuan kundër shqiptarit ishin të manipuluar, ku dëshmitarja kryesore ndryshoi qëndrimin e saj. Mësohet se ajo ishte kërcënuar nga pala e viktimës, që të dëshmojë kundër shqiptarit. Për dënimin e Margjokaj, gjykata është bazuar vetëm në dy gëzhoja të gjetura në vendngjarje, ndërsa arma e krimit nuk është gjetur ende.
Ngjarja në fjalë është regjistruar në maj të vitit 2011 në Athinë. Një qytetar grek u qëllua për vdekje nga tre persona që udhëtonin më një makinë, dy prej të cilëve ishin të maskuar. Dëshmitarët janë shprehur se shqiptari e ka kërcënuar viktimën, nëpërmjet profilit të të dashurës së tij në Facebook.
Sipas policisë, viktima kishte publikuar në profilin e tij në Facebook një postim ku shkruhej:
Më pas shqiptari i ka shkruajtur ish-të dashurës:
Kjo është prova më e fortë për momentin ndaj shqiptarit. Mësohet se viktima dhe ish-e dashura e shqiptarit punonin së bashku në një kompani me produkte kozmetike. Pas ekspertizës së gëzhojave të gjetura në vendngjarje, rezultoi se me të njëjtën armë ishte kryer edhe një vrasje tjetër. Mospranimi nga gjykata i analizës së ADN-së, çoi në dënimin me burgim të përjetshëm për shqiptarin. Ky i fundit nuk u ndje mirë ditën e sotme dhe kërkoi shtyrje të seancës. Sipas mediave greke, ka shumë mundësi që kjo çështje të përfundojë deri në gjykatën e Hagës.