Sadetin Sula, burri që urdhëroi punëtorin e tij, Fatjon Karameshtën, të vriste të shoqen, nënë e tre fëmijëve, është dënuar me burgim të përjetshëm.
38 vjeçarja Suela Sula u gjet e mbytur në tualetin e mobilerisë, të cilën e kishte në bashkëpronësi me bashkëshortin e saj, Sadetin Sula.
Ngjarja e rëndë e 18 prillit tronditi jo vetëm qytetin e Shkodrës, por mbarë opinionin shqiptar.
Në fillim dyshohej se ishte vetë biznesmeni Sadetin Sula, ai që kishte mbytur me duar bashkëshorten e tij, por në bazë të hetimeve dhe analizës së AND u zbulua se ekzekutori ishte Fatjon Karmeshta, punëtor pranë mobilerisë në pronësi të çiftit, me të cilin biznesmeni kishte raport të ngushtë.
Pavarësisht se mohoi të ketë qenë porositësi i vrasjes së rëndë, Sula u dënua me burgim të përjetshëm nën akuzën për “vrasje me dashje, për shkak të marrëdhënieve familjare për arsye xhelozie" .
Prokuroria e Krimeve të Rënda ka kërkuar ditën e sotme dënimin me burgim të përjetshëm për Karmeshtnën, bashkëpunëtorin e Sadetin Sulës.
Viktima ishte shoqëruar në mëngjes në vendin e punës nga bashkëshorti i saj, i pandehuri Sadetin Sula, i cili më pas provohet se ishte kthyer në qytetin e Shkodrës.
Ishin regjistrimet telefonike ato që zbuluan se Sadetin Sula bisedonte me Karmeshtnën lidhur me të shoqen dhe dyshimet që kishte ndaj saj, teksa shfaqte xhelozi.
