Katër policët të cilët liruan kosovarin e shumë kërkuar për trafik droge, Naser Gashi, janë njohur ditën e sotme me masën e sigurisë.
Për shefin e komisariatit të Kukësit, Agim Basha, Krimet e Rënda dhanë arrest me burg. Arrestimi i Bashës nuk është kryer për shkak se ai nuk u gjet në shtëpi.
Për vartësin e Bashës, Kujtim Saphiun, gjykata vendosi "arrest shtëpie". Ndërsa për dy efektivët e tjerë, Ferdinand Xhepa dhe Shkëlzen Ibaj, Krimet e Rënda vendosën detyrim paraqitje për shpërdorim detyre.
Hetimet ndaj zyrtarit të Policisë së Kukësit dhe efektivëve të tjerë nisën pas denoncimit të bërë nga Shkëlqim Pepkolaj. Ky i fundit prej ditësh ndodhet në azil sëbashku me familjen.
Kujtojmë se mbrëmjen e 17 tetorit në pikën kufitare të Morinës u paraqit një person me emrin Samir Bula. Pas marrjen së shenjave të gishtave, ka rezultuar se personi në fjalë ishte Naser Gashi, i datëlindjes 1960 nga Kosova.
Ky i fundit ishte dënuar nga Apeli i Krimeve të Rënda me 7 vite e 4 muaj burg. Atij i kishin mbetur edhe 2454 ditë burg dhe ishte shpallur në kërkim me kartelë të kuqe. Pas arrestimit të tij, prokurorja Rita Gjati urdhëroi lirimin për shkelje procedure.
