Kosova është një shtet i varfër ekonomikisht, por investimet për t’i pasur rrugët nga më modernet kapin shifra të larta. Pa përfunduar një autostradë, në shtetin e Kosovës fillojnë punimet për një tjetër rrugë e autostradë.
Buxheti i shtetit në vitet e fundit ka shkuar në rrugë dhe asfalte. Qeveria e Kosovës e drejtuar nga Ramush Haradinaj ka paralajmëruar se gjatë këtij viti pritet të nisë së ndërtuari edhe një autostradë tjetër.
Autostrada e re pritet të lidhë qytetet Istog- Pejë – Deçan- Gjakovë dhe Prizren, andaj ndryshe njihet edhe si “Autostrada e Dukagjinit”. Kjo autostradë llogaritet të jetë ndër autostradat më të gjata në territorin e Kosovës, me 91 kilometra. Sipas “Monitor’’, për këtë projekt kanë filluar përgatitjet. Institucionet janë shprehur se do të realizohet sipas kritereve dhe standardeve më të larta.
Drejtues të Ministrinë së Infrastrukturës kanë bërë me dije për këtë projekt deri në muajin qershor do të ketë debatet publike me qytetarët e komunave, nëpër të cilat kalon autostrada. Kurse, në fund të vitit pritet që të fillojnë punimet për ndërtimin e saj. Siç kanë thënë në Ministrinë e Infrastrukturës, vlera e përafërt e këtij projekti, do të arrijë deri në një miliard euro.
“Kjo është vlera e përafërt, përfshirë këtu edhe shpronësimet e nevojshme. Para këto që pritet të shfrytëzohet nga buxheti i Kosovës”. Në Kosovë aktualisht, në proces të ndërtimit është autostrada Prishtinë – Gjilan – Konçul, që lidh Kosovën me Serbinë jugore, përkatësisht me Luginën e Preshevës. Punimet kanë nisur në muajin prill të vitit të kaluar, ndërsa kohëzgjatja e realizimit është 30 muaj. Rreth 87 milionë euro llogaritet se do t’i kushtojë buxhetit kjo autostradë.
Kurse, autostrada Prishtinë – Hani i Elezit, që lidh Kosovën më Maqedoninë, e quajtur “Arbën Xhaferi”, ishte paraparë të përfundonte në fund të vitit 2018. Por, ajo nuk ka përfunduar ende, duke i tejkaluar tashmë afatet e parapara. Autostrada e parë e ndërtuar në Kosovë, ishte ajo që e lidh Kosovën me Shqipërinë, e quajtur “Rruga e Kombit – Ibrahim Rugova”.
Infrastruktura rrugore, kryesisht ka mbizotëruar investimet në Kosovë këto vitet e fundit. Përveç autostradave, investime të mëdha janë përqendruar edhe në ndërtimin e rrugëve lokale e magjistrale. Përqindja më e madhe e buxhetit të Kosovës, zakonisht është ndarë pikërisht për ndërtimin e autostradave.
