Presidenti serb Aleksandar Vuçiq thotë se është i gatshëm të bëjë gjithçka që mundet, gjithçka që nuk është poshtërim dhe shkatërrim i Serbisë, për të parandaluar çdo konflikt lufte, duke mbrojtur dinjitetin e Serbisë.
Ai ka kritikuar opozitën e tij që po "shesin patriotizëm", duke i akuzuar se po vjedhin shtetin dhe po mbajnë fëmijët jashtë Serbisë, transmeton JOQ Kosova.
“Mos, sepse luftoj për Kosovën më mirë se ju, dhe unë e kam ruajtur atë … dhe sot serbët në veri dhe Graçanicë ndjehen më të lirë se sa ishin 10 vjet më parë kur ata ishin të shqetësuar për sigurinë e tyre çdo ditë, ata janë ende të shqetësuar sot, por të paktën pak më pak. Dhe mos më mbani leksione patriotike, mos më flisni ju politikanë që vidhni para dhe i fshihni fëmijët jashtë vendit“, tha Vuçiq.
Këto reagime të Vuçiq vijnë në një kohë kur për luftën u fol edhe në Kosovë, nga kryetari i Mitrovicës Jugore, Agim Bahtiri.
Ai tha se në rast se preket Mitrovica do të ketë luftë, sipas tij, të paparë më herët. Pas këtyre fjalëve kishte ardhur reagimi i homologut nga komuna veriore, i cili kërkoi nga KFOR të rris sigurinë, duke i cilësuar deklarimet e Bahtirit si kërcënim.
Ndryshe, kohët e fundit janë acaruar raportet në mes Kosovës dhe Serbisë, sidomos muajt e fundit kur po flitet për një marrëveshje finale.
