Mbrëmjen e djeshme në prangat e policisë ka rënë një tjetër anëtar i bandës së Shijakut, pas arrestimit të 20 anëtarëve në muajin Tetor të 2018, në kuadër të operacionit "Vol-vo 4".
I arrestuari është Hekuran Hoxha, 48 vjeç. I njohur ndryshe si "Roni i Shijakut", Hekurani duket i dhënë pas udhëtimeve në vende ekzotike dhe makinave të shtrenjta, njëkohësisht edhe pronar i disa bizneseve në zonën e Shijakut, ku dy prej tyre një pikë karburanti, si dhe një bar-kafe i ka "pagëzuar" me nofkën e tij, "Roni".
“Roni i Shijakut”, dyshohet se porositi heroinën që prodhohej në laboratorin e Hasit, ku u gjetën dhe sekuestruan 250 kilogramë heroinë bashkë me përzierësit, e u arrestuan 5 persona. Sipas prokurorisë Saimir Gjepali, (i shpallur në kërkim) dhe Hekuran Hoxha, janë dy kontaktet e biznesmenit Admir Hoxha, ende në kërkim, që akuzohet si njeriu që financoi ngritjen e laboratorit të drogave të forta.
Ndaj Hekuran Hoxhës rëndojnë 6 akuza. Ai akuzohet për kryerjen e veprave penale “Prodhim dhe shitje e narkotikëve”, “Trafikim i narkotikëve”, “Prodhim dhe fabrikimi i lëndëve narkotike dhe psikotrope, në bashkëpunim në formën e posaçme të grupit të strukturuar kriminal", “Grup i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, “Pastrimi i produkteve të veprës penale”.
Por edhe pse prej kohësh ka qenë një person në vëzhgim nga policia, nisur edhe nga precedentët e kaluar, pasi është arrestuar të paktën tre herë për trafik heroine në Turqi dhe Itali, Hekuran Hoxha nuk është ndaluar aspak. Ai ka vazhduar të promovojë në rrjetet sociale jetën e luksit nëpër pishina, rezidenca luksoze dhe vende të super të shtrenjta ku ka kaluar pushimet edhe familjarisht, shkruan Shqiptarja.
Hekuran Hoxha është arrestuar edhe në vitin 2009, bashkë me 4 persona të tjerë, ku 5 të arrestuarit u etiketuan si “5 bosët e Shijakut”, pasi kishin mundur të trafikonin rreth 488 kg heroine nga Shqipëria drejt Italisë.
Bashkë me Hekuran Hoxhën, në 2009 u arrestuan edhe Alket Hatija i njohur si “Zoti i drogës”, si edhe Fatbardh Hoxha, Mentor Shehu dhe Saimir Gjepali, që të gjithë nga Shijaku. Gjithashtu, ai është arrestuar edhe në vitin 2011 si pjesë e një grupi që trafikonte heroinë nga Turqia drejt Europës.