Një tentativë vrasjeje ndaj dy efektivëve policie me një automjet të blinduar tip “Audi” u regjistrua disa muaj më parë në tregun agro-ushqimor të Elbasanit.
I akuzuar në lidhje me këtë ngjarje është 30-vjeçari Suel Çela i njohur edhe si një prej të fortëve të Elbasanit, i cili është shpallur në kërkim dhe dyshohet se ishte në timonin e automjetit.
Ai konsiderohet si një preson me rrezikshmëri të lartë.
Sot Policia e Elbasanit ka publikuar emrat e 32 personave, të cilët janë të shpallur në kërkim dhe për të kryer arrestimin e tyre kërkohet edhe ndihma e qytetarëve.
Në foton e publikuar nga Policia e Shtetit ditën e sotme në lidhje me personat e rrezikshëm në qytetin e Elbasanit, që janë shpallur në kërkim, jepet dhe emri e mbiemri tjetër i 30-vjeçarit si: Marjus (Suel) Petrit Lulaj (Çela).
Incidenti, nga i cili u publikuan dhe video atë kohë, shkaktoi një reagim të madh në radhët e strukturave të Policisë së Shtetit dhe lëvizje dhe tërhoqi vëmendjen duke u bërë lajmi kryesor në mediat shqiptare.