Një Komision Hetimor Parlamentar në kuadër të Kuvendit të Kosovës, ka hartuar një raport përmes të cilit kërkohet të hetohet Qeveria dhe Presidenca lidhur me harxhimet për lobim.
Ndërkaq, në po të njëjtin raport, konstatohet e presidenti kosovar Hashim Thaçi, ka përdorur paratë publike për të promovuar librin e tij biografik, raporton JOQ Kosova.
“Në bazë të dokumenteve të prezantuara nga MPJ drejt Komisionit Hetimor Parlamentar, më 18 korrik të vitit 2017, Kompania ‘Alston & Bird’ ka dërguar faturën e punëve të kryera për muajin paraprak, pra qershor të vitit 2017. Fatura ka numrin 10900XXX. Ka titullin ‘Strategic Advice and Counsel’. Ka datë 18 korrik, 2017. Ka numrin e klientit: 065XXX. Ka numrin e lëndës 10900XXX. Shuma e faturës në fjalë është 65,000.00 dollarë. Në përshkrimin e punëve nga kompania, ndër të tjera, thuhet se ‘Senator Dole edited and revised his foreëord to President Thaçi’s upcoming book’. Përkthyer në shqip, ‘Senatori Dole, ka edituar dhe reviduar fjalën e tij hyrëse në librin e ardhshëm të Presidentit Thaçi’”, thotë raporti i Komisionit Hetimor Parlamentar për shpenzimet për lobim.
Së këndejmi, Komisioni ka ftuar organet kompetente të Shtetit të hetojnë pagesën në fjalë mbi bazën e dyshimeve se fondet e lobimit janë përdorur për promovime personale, më saktësisht, për shkrimin e një pjese të librit të Presidentit Hashim Thaçi.
Ndryshe, presidenti Thaçi ishte kritikuar ashpër nga opozita dhe mediat rreth financimit të librit që fliste për jetën e tij./JOQ Kosova
