Shteti serb është tensionuar ditëve të fundit pasi opozita dhe njohës të politikave në Serbi po e akuzojnë presidentin, Aleksandar Vucic, se po bëhet gati ta njohë Kosovën si shtet.
Pas protestave dhe tensioneve në Kuvend, ku madje deputetët fjetën aty, ka folur edhe opozitar Vuk Jeremic, i cili po akuzon Vucicin, raporton JOQ Kosova.
Ai thotë se Vucic ishte takuar në Romë me presidentin e Kosovës, Hashim Thaçin, më 4 nëntor dhe ky takim lidhej direkt me vendosjen e taksës ndaj produkteve serbe.
Jeremic ka thënë se po krijohet atmosferë lufte, për t’u justifikuar njohja e shtetit të Kosovës duke e lënë të marrë ulëse në OKB.
“Nëse përkufizohen Serbia e Kosova në mënyrën në të cilën e duan Vucic e Thaçi, atëherë s’do të ketë pengesa që Kosova të bëhet anëtare e OKB-së. Nëse bëhet anëtare e OKB-së, atëherë nuk ka më mekanizma të drejtësisë ndërkombëtare që të pengohet ndryshimi i kufijve në Ballkan, duke filluar nga formimi i Shqipërisë së madhe e më tutje”, ka thënë Jeremic.
Ndryshe, Kosova e Serbia janë futur në fazën përfundimtare të dialogut, dhe është duke u diskutuar intensivisht lidhur me një marrëveshje finale që do të përmbyllte kapitullin mbi 100 vjeçar./JOQ Kosova