Kryetari i Komunës së Mitrovicës, Agim Bahtiri, i cili besonte se me një concert të Shakirës do ta hapte urën e Ibrit, ka akuzuar ndërkombëtarët se kanë dështuar për hapjen e kësaj ure.
Bahtiri për mediat e Kosovës ka thënë se beson që ura e Ibrit nuk është hapur qëllimisht, raporton JOQ Kosova.
Sipas tij, kjo çështje do të bëhet pjesë e negociatave të Brukselit për ta kushtëzuar Kosovën me praninë e ndonjë marrëveshje me Serbinë.
Bahtiri ka thënë se Kosova në këtë proces nuk duhet ta pranojë asnjë kushtëzim, derisa e ka ftuar spektrin politik të arrijë një konsensus kombëtar për fazën finale të dialogut Kosovë – Serbi.
“Bashkësia ndërkombëtare ka dështuar totalisht për hapjen e urës dhe për zbatimin e marrëveshjes për këtë çështje që është arritur në Bruksel. Dështimi i saje neve na ka shtyrë edhe më shumë ta fillojmë iniciativën tonë për bashkimin e qytetit”, ka thënë Bahtiri.
Ndryshe, Bahtiri ishte kritikuar në vazhdimësi për përfshirje në politika të mëdha, ani pse ai është vetëm kryetar komune./JOQ Kosova