Sot Kuvendi i Kosovës do të vazhdojë dy seanca të mbetura në gjysmë muajin e shkuar, në kuadër të së cilës është edhe pika e votimit të një rezolute rreth dialogut me Serbinë.
Kjo rezolutë akoma nuk dihet nëse do të marrë votat e nevojshme, për shkak të mungesës së konsensusit politik, mirëpo një gjë tjetër rreth dialogut po afrohet me shpejtësi, raporton JOQ Kosova.
Bëhet fjalë për krijimin e grupit negociator të Kosovës që do ta përfaqësoje shtetin në bisedime me Serbinë në fazën më kritike të saj, që tani po quhet si “faza finale”.
Dy parti opozita, ndërkohë, janë duke bërë befasinë pasi kanë pranuar të jenë pjesë e ekipit negociator që është inicuar nga pozita.
PSD dhe Alternativa që janë jashtë Qeverisë kanë vendosur të përfaqësojnë opozitën në ekipin negociator, ku mendohet të ketë edhe përfaqësues të shoqërisë civile.
Ndërkohë, vetëm Lëvizja Vetëvendosje dhe Lidhja Demokratike e Kosovës janë betonizuar kundër ekipit negociator, dhe po refuzojnë të marrin pjesë. Ata po kritikojnë Thaçi se po do ta përfshijë grupin negociator në pazaret personaleqë, sipas tyre, ka nisur me presidentin serb Vucic./JOQ Kosova