Taksa 100% për produktet e importuara nga Serbia ka irrituar jo vetëm shtetin serb por edhe katër komunat në veri të Kosovës, të cilat banohen nga shumica serbe.
Taksa e propozuar nga kryeministri Haradinaj para pak ditësh dhe arrestimet e fundit në Veri, kanë bërë që në formë revolte katër kryetarët e komunave: Mitrovicë e Veriut, Zubin Patok, Sveçan dhe Leposaviç të japin dorëheqjen njëherësh gjatë një seance të jashtëzakonshme.
Por dorëheqja nuk është simbolika e vetme kundër taksës, pasi serbët e veriut të Mitrovicës kanë paralajmëruar zhvillimin e një proteste për të kundërshtuar presionin shtypës të institucioneve të Prishtinës të lidhur me taksën.
E megjithëse protesta është paralajmëruar paqësore, komandanti i forcave paqeruajtëse të udhëhequra nga NATO në Kosovë, Salvatore Couci, ka bërë thirrje që këto çështje të zgjidhen paqësisht dhe të shmanget me çdo kusht përdorimi i dhunës.