Kompania amerikane e pajisjeve teknologjike, Apple ka njoftuar se së shpejti do të rregullojë prolemin e shumëraportuar të përdoruesve me selfiet.
Siç është raportuar kohëve të fundit nga përdoruesit, iPhone XS i ri i bënte selfiet të dukeshin shumë mirë duke e mjegulluar pak lëkurën. Pra fotot dukeshin sikur po i bëje duke përdorur filtra.
Efekti misterioz është i pranishëm edhe në iPhone XS Max, i cili ka të njëjtën kamerë të përparme si iPhone XS.
Është vënë në dukje se filtrat "beauty" për selfiet janë jashtëzakonisht të njohura në disa nga tregjet aziatike ku Apple po përpiqet të rritet në treg.
Teoria është se, kur iPhone XS zbulon një fytyrë, ajo zbaton disa ndryshime delikate në imazhin përfundimtar që do t'i bënte përdoruesit në ato tregje më të lumtur me mënyrën se si dukeshin me veten.
Apple ka pranuar se në përditësimin e ardhshëm të sistemit të operimit do ta rregullojë këtë problem.