Surprizë por jo dhe aq e papritur ka qenë dorëheqja e ministrit të Brendshëm Fatmir Xhafaj, e cila nuk u lajmërua nga vetë ai, por nga kreu i qeverisë, Edi Rama, përmes një shkrimi në Twitter.
Prej kohësh marrëdhëniet mes Ramës e Xhafës kanë qenë të tensionuara. Shenjat e para konflikti mes të dyve i ka dhënë gjatë mbledhjes së qeverisë në Korçë, ku Xhafa u dëgjua teksa i thoshte Ramës se nuk ishte Saimir Tahiri, duke lënë të kuptonte se nuk do t'i bindej urdhrave të tij.
Operacionet e fundit policore të udhëhequra me "bekimin" e ish-ministrit, duket se kanë tensionuar edhe më shumë marrëdhënien e tij me Ramën, teksa së fundmi u përfol për përgjime që tregonin lidhje mes kryebashkiakut të Durrësit, Vangjush Dako, me mafien e Durrësit dhe emra të njohur të botës së krimit.
Rama i ka dalë gjithmonë në mbrojtje Dakos, ndërsa Xhafaj nuk i është bindur kurrë, por paralelisht me këtë ngjarje, ish-ministri Saimir Tahiri kishte lajmëruar daljen në një konferencë të jashtëzakonshme ditën e sotme rreth orës 10:30, ku do të jepte deklarata të forta e tepër të rëndësishme, që "do të shkërmoqinin bandat brenda Partisë Socialiste", sikurse shkruante dhe Pamfleti.
Mirëpo, pa pritur e pa pandehur, Tahiri, i cili kishte kërcënuar për të vërtetat që do të thoshte në konferencë, vendosi të shtyjë fjalën e tij për ditën e hënë, duke qenë se të tjera zhvillime të rëndësishme do të ndodhnin ditën e shtunë (pra sot).
Sikurse lajmëroi edhe disa ditë më parë deputeti i LSI-së, Flamur Çelaj, Rama ka kërkuar prej kohësh shkarkimin e Xhafës, por një gjë e tillë nuk është lejuar nga ndërkombëtarët, të cilët e kanë preferuar ish-ministrin, për shkak të veprimeve të ndërmarra në kuadër të reformës në drejtësi dhe çuarjen para drejtësisë së mjaft kriminelëve me emër.
Mirëpo, siç duket, një mbështetje e tillë e ka trembur Ramën, pasi herë pas here, në qarqe të ngushta të PS-së flitej për forcimin e rolit të Xhafës brenda partisë dhe figurës së tij mes qytetarëve, teksa potencial ishte kandidimi për Kryeministër, në rast të një rrëzimi të mundshëm të Edi Ramës.
E siç duket, këtë herë Rama vendosi të mbrojë Dakon, duke "hequr qafe" me një të rënë të lapsit, me një koment në Twitter, ministrin e përkrahur nga LSI e të sulmuar fort nga Partia Demokratike, si dhe njëkohësisht, duke i mbyllur gojën Saimir Tahrit.
E çuditshme është kjo dorëheqje e ish-ministrit të Brendshëm, tekstin e së cilës deri më tani askush nuk e ka lexuar dhe nuk është bërë publik.
Ndryshe nga parardhësit e tij, Xhafaj ka zgjedhur të largohet në heshtje, pa e komentuar dorëheqjen. Gjatë punës së tij ai zgjodhi të dilte shumë rrallë në media, kur jepte mesazhe të rëndësishme për opinionin publik.
Fatmir Xhafaj qëndroi një vit e një muaj në krye të Ministrisë së Brendshme./JOQ.al