Ka dalë edhe njoftimi zyrtar i SPAK-ut në lidhje me arrestimin e kryebashkiakut të Bulqizës, Lefter Alla dhe 13 zyrtarëve të tjerë, përfshirë edhe zëvendëskryetaren, Enkeleda Lleshi. Për dy prej të arrestuarve u është caktuar masa “arrest shtëpie”.
Pavarësisht se Alla ka abuzuar në mënyrë sistematike me tenderat, bëhet me dije se ai është akuzuar vetëm për një prej tyre. Ai dyshohet se ka favorizuar një kompani për të fituar tenderin me vlerë 322 milionë lekë (3.22 miliardë lekë të vjetra) për ndërtimin e ujësjellësit të Bulqizës.
Ndërkohë, ka dyshime të forta se punimet për ujësjellësin janë kryer nga një kompani tjetër, që ka lidhje të ngushta shoqërore me Allën. Pra, me pak fjalë, kompania fituese e tenderit është vetëm një kamuflim, që të mos dallohet se Alla ia ka dhënë tenderin shokut të tij të ngushtë.
Në këto kushte, kompania fituese ka marrë bakshishin e saj dhe më pas tenderi do të zbatohej nga kompania e shokut të Lefterit. Shpresojmë që SPAK-u të futet edhe më thellë dhe të zbulojë akoma më shumë abuzime për të vënë para drejtësisë të gjithë ata që janë tallur me djersën e shqiptarëve.
Përveç lidhjes së ngushtë shoqërore me Aqif Koneshën (një prej pronarëve të kompanisë 2AF), të cilit i ka dhuruar një tender, mësohet se Lefter Alla ka pasur edhe lidhje farefisnore me personin në fjalë, çka mund ta çojë edhe hetimin në një tjetër rrjedhë, pasi favorizimi i personave të afërm dhe ka masa më të rënda. Melaim Damzi, daja i Lefter Allës, është kushëri i parë me Koneshën dhe këtu bëhet edhe lidhja mes tyre.
Pas arrestimit janë kryer kontrolle të hollësishme në banesat e të gjithë të proceduarve, si dhe në atë të vëllait të Allës. Për momentin nuk bëhet me dije nëse është gjetur ndonjë element i paligjshëm. Në vijim pritet të mësohet më shumë.
NJOFTIMI I SPAK – “Nga hetimi ka rezultuar se për shtetasin nën hetim L. A. me detyrë Kryetar Bashkie me funksionin e tij si i zgjedhur vendor për të administruar konform ligjit Njësinë vendore Bashkinë Bulqizë evidentohet qartësisht sjellja e tij duke dokumentuar disa fakte penale si shkeljet gjatë procedurës së prokurimin publik me procedurë të hapur në datë 30.04.2021, operatorëve ekonomikë “Egland Sh.p.k” dhe “BE-IS” Sh.p.k, me objekt “Ndërtimi rrjetit furnizimit dhe rrjetit shpërndarës Ujësjellësi dhe ndërtimi i rrjetit të KUZ , Lagja e vjetër, qyteti Bulqizë, Bashkia Bulqizë”, me vlerë të tenderit në shumën 322.439.000 lekë të reja, me afat kohor 10 mujor.
Ky shtetas nën hetim në bashkëpunim me nënkryetaren e Bashkisë, dhe punonjësit e tjerë, si specialiste e prokurorimeve, anëtarët e KVO, kanë bërë të mundur që këtë tender ta fitonte me dokumentacion BOE Egland shpk dhe BE-IS shpk, duke krijuar avantazhe për këtë subjekt gjatë procedurës së prokurimit. Në një kohë që nga hetimi ka dyshime të arsyeshme të bazuara, se punimet janë kryer nga OE 2AF Albania shpk, lidhje shoqërore e kryetarit të Bashkisë”, thuhet në njoftimin e SPAK-ut”.
