Qindra qytetarë janë mbledhur ditën e sotme në Tiranë për të protestuar për vrasjen e 7-vjeçares Jonada Avdiu në plazhin e Potamit nga polici Arjan Tase. Familjarë, gjyshër dhe prindër të shumtë janë mbledhur bashkë me fëmijët e tyre për të protestuar e kërkuar drejtësi për këtë ngjarje tragjike.
Të gjithë duan që drejtësia të vihet në vend sa më parë të jetë e mundur pasi frika ka kapluar jo vetëm prindërit por edhe fëmijët e tyre të cilët nuk ndihen të sigurtë as në pushime.
Duke u ndalur te fëmijët, 3 vogëlushë i janë bashkuar protestës për vdekjen e bashkëmoshatares së tyre. Në duar tri të vegjëlit mbajnë pankarta për Jonadën e cila kishte ardhur nga Anglia për të kaluar pushimet në Shqipëri.
Por për fat të keq këto pushime në jug të vendit u kthyen në tragjedi për familjen Avdia e cila dje përcolli për në banesën e fundit 7-vjeçaren Jonada.