Shefki Kurti është i moshuari shqiptar që u gjend i pajetë dhe i masakruar në një kanal në provincën ku ai banonte në Itali.
Ishin banorët e zonës të cilët kanë gjetur mbetje të ndara në disa thasë dhe më pas kanë lajmëruar Policinë, ndërkohë që zhdukja e tij ishte denoncuar rreth tri ditë para se të gjendeshin pjesët e trupit.
Policia dhe prokuroria italiane janë shokuar kur janë përballur me skenën e krimit, ndërkohë që kanë kërkuar ndihmën e komunitetit t‘i ndihmojnë të hedhin dritë mbi atë vrasje të rëndë.
Policia italiane është befasuar kur ka mësuar nga ekspertiza mjekoligjore që ka treguar se vrasja e Kurtit mund të kishte ndodhur së paku një javë para se të gjendej trupi. Ata duke bërë përllogaritjet e kohës kur është kryer denoncimi i familjarëve për humbjen e tij, kanë konstatuar se bëhet fjalë për të paktën 3 ditë me vonesë të denoncimit.
Policia dhe prokuroria kanë mundur të marrin dëshmitë e familjarëve të viktimës, të cilët pritet të japin detajet e rëndësishme për hetimin, por pa treguar ende detaje nga këto dëshmi.
NGJARJA DHE DYSHIMET
Sipas të dhënave, Shefki Kurti, 72 vjeç, banonte në zonën e Ravigos bashkë me familjen e tij, gruan dhe dy fëmijë të rritur. Ai është zhdukur disa ditë më parë dhe trupi u gjend në një kanal në afërsi të lumit Adigetto, lum që kalon pak metra larg zonës në të cilën banonte familja Kurti.
