Karriera e talentit brazilian, Renan Viktor ka marrë një ndryshim drastik. Talenti i "Selecaos" po shkëlqente me klubin e Palmeiras dhe shihej nga të gjithë si qendërmbrojtësi i të ardhmes.
Megjithatë, ai mund ta mbyllë me futbollin e luajtur pasi e ardhmja mund të jetë pas hekurave të burgut, për një natë që e teproi me miqtë e tij.
20-vjeçari që u shpall Kampion Bote me Brazilin për moshën U17 në vitin 2019 është përjashtuar nga ekipi i Palmeiras, që i ka prishur kontratën dhe tashmë ai mbetet i vetëm për t’u mbrojtur në gjykatë, për akuzën se ka shtypur për vdekje një 38-vjeçar.
Në orët e para të mëngjesit të 22 korrikut, Renan Viktor, ka përplasur me makinë një motoçiklist 38-vjeçar, i cili më pas u nda nga jeta në rrugën për në spital. Futbollisti ishte në timon pa patentë dhe nën ndikimin e alkoolit, pasi po kthehej nga një festë.
Ai u arrestua por u lirua me kusht pasi pagoi rreth 45 mijë euro. Por tani, me fillimin e seancave të mirëfillta gjyqësore, kërkohet që të dënohet me 10 vite burg sipas legjislacionit përkatës.