Një polic shteti ka vrarë një vajzë 7-vjeçare ditën e sotme në plazhin e Potamit. Arjan Tase po shëtiste me një gomone të fuqishme kur u afrua në breg dhe i mori jetën vogëlushes që po lahej në det.
Fakti që autori i këtij krimi është polic ka irrituar shumë qytetarët shqiptarë të cilët ndihen çdo ditë e më të pasigurtë për jetën e tyre në Shqipëri. Për të shprehur indinjatën e tyre, ata vërshuan me komente në faqen zyrtare të Policisë së Shtetit.
Por Policia e pakënaqur nga komentet e qytetarëve vendosi t’i fshihte dhe fshinte shumicën e tyre duke lënë vetëm disa në njoftimin e përjashtimit të policit Arjan Tase.
Pak orë më vonë Policia njoftoi shkarkimin e gjithë zinxhirit komandues të Drejtorisë për Kufirin dhe Migracionin në Vlorë. Në këtë postim, Policia është treguar më e “kujdesshme” pasi ka limituar numrin e komenteve duke zgjedhur vetë se kush mund të komentojë ose jo.
Mesa duket Policia e Shtetit e cila ishte paralajmëruar shumë herë për një tragjedi të tillë nuk po e pranon dot zërin e qytetarëve dhe indinjatën e tyre.