Gjatë ditës është raportuar se rreshteri i Policisë Rajonale në Pejë, Senad Hamziq ka sulmuar mbrëmë një zyrtare policore, përderisa ishin jashtë detyrës zyrtare.
Ndërkohë, janë publikuar pamjet e këtij sulmi fizik ndaj zyrtares policore.
Pamjet e publikuara nga Sinjali shfaqin Hamziqin brenda një veture teksa sulmon fizikisht zyrtaren e Policisë së Kosovës.
Inspektorati Policor i Kosovës ka arrestuar sot Hamziqin, të dyshuar se ka kryer veprën penale “Lëndim i rëndë trupor” dhe “kanosje”.
IPK njofton se me gradën e rreshterit, Hamziq, “jashtë detyrës zyrtare është i përfshirë si i dyshuar në një rast të lëndimit të rëndë trupor”.
Pas kësaj, hetuesit e IPK-së kanë dalë në vendin e ngjarjes dhe në koordinim me Prokurorin kujdestar kanë ndërmarrë disa veprime hetimore kurse viktima, e cila është zyrtare policore është dërguar për trajtim mjekësor.
“Pas këtyre veprimeve hetimore, zyrtarit policor me vendim të prokurorit i është caktuar masa e ndalimit për 48 orë me dyshimin se ka kryer veprën penale ‘Lëndim i rëndë trupor’ dhe ‘kanosje’”, thuhet në njoftimin e Inspektoratit.
