Apeli i Gjykatës së Posaçme kundër krimit të organizuar dhe korrupsionit ka lënë në burg ish-deputetin socialist Alqi Bllako, i akuzuar për çështjen e inceneratorëve. Kujtojmë se Bllako kishte kërkuar një masë sigurie më të butë, me pretendimin se nuk ishte i rrezikshëm, dhe nuk ka akses në prishjen e provave.
Alqi Bllako akuzohet se në rolin e sekretarit të përgjithshëm të Ministrisë së Mjedisit, ka falsifikuar dokumentet së bashku me Lefter Kokën, në mënyrë që përfituese të ishte kompania e biznesmenit Klodian Zoto. Bllako akuzohet për veprat penale shpërdorimi i detyrës dhe korrupsion pasiv i funksionarëve të lartë shtetërorë ose të zgjedhurve vendorë.
