Para pak ditësh u njoftua se policia ka zbuluar në Vorë një banesë të përshtatur për kultivimin e lëndëve narkotike, të llojit kanabis sativa. Një 33-vjeçar nga Peqini e kishte marrë me qira banesën nga A. Gj., 32 vjeç i cili ishte shok me djalin e pronarit të shtëpisë. 33-vjeçari me iniciale F.B ka treguar në polici se shtëpinë e kishte marrë me qira për të jetuar vetëm por gjatë rrugës kishte ndryshuar mendje. "GazetaSi" ka mësuar se 33-vjeçari kishte patur si qëllim që shtëpinë ta shfrytëzonte për prodhimin e Bitcoinit por pastaj kishte ndryshuar mendim dhe e kishte kthyer në "shtëpi bari". Por pasi kishte parë se prodhim nuk po merrte dhe ajo që kishte po prishej vendosi ta çmontonte "shtëpinë e barit" që kishte ngritur.
Në lidhje me këtë ngjarje policia ka arrestuar 33-vjeçarin nga Peqini pasi akuzohet ër veprat penale “Prodhimi dhe shitja e narkotikëve”, “Vjedhja e energjisë elektrike ose impulseve telefonike” dhe “Përdorimi i paligjshëm i teknologjisë së lartë”. Ndërkohë është proceduar penalisht A. Gj., 32 vjeç, banues në Don Bosko, për veprën penale “Moskallëzimi i krimit” dhe Sh. D., 55 vjeçe, banuese në Vorë, me detyrë faturiste pranë OSHEE-së, për veprën penale “Shpërdorimi i detyrës”.