Me ndryshimet e mëdha që po kalon Çelsi në javët e fundit, e ardhmja e Armando Brojës te kjo skuadër është në pikpyetje, pasi mendohet se trajneri Tuhel do të kërkojë edhe më shumë kohë për të vlerësuar lojtarin, derisa të mësohen me qartësi planet e drejtuesve të rinj të londinezëve. megjithatë, ofertat për Brojën nuk mungojnë.
Sulmuesi i përfaqësueses shqiptare është një objektiv i merkatos së futbollistëve dhe duket se klubi i West Ham është gati të bëjë gjithçka për të siguruar firmën e tij. Devid Mojes, ish-trajneri i Mançester Junajtid i cili aktualisht drejton këtë skuadër, ka piketuar Brojën si një emër i cili mund të garantojë repartin e avancuar për shumë vite.
Fillimisht ai tentoi ta blinte në janar por nuk pat sukses e mendon se as në këtë verë nuk do të sigurojë firmën e tij nëse i kërkon Çelsit që t’i shesë kartonin e futbollistit. Por sipas mediave pranë klubit, te Uest Hem janë të bindur se zgjidhja do të ishte huazimi për një sezon me të drejtën për të blerë kartonin e tij në verën e vitit 2023.