3 Maji është Dita Botërore e Lirisë së Shtypit e cila u shpall nga Asambleja e Përgjithshme e OKB-së në dhjetor të vitit 1993, sipas rekomandimit të Konferencës së Përgjithshme të UNESCO-s. Që nga ai vit, dita e përvjetorit të Deklaratës së Windhoek, një promovim mbi Shtypin Afrikan të Pavarur dhe Pluralist, organizohet më 3 maj në mbarë botën si Dita Botërore e Lirisë së Shtypit.
Po sa e lirë është media sot dhe sa respektohet puna dhe përkushtimi i një gazetari? Vlen të theksohet se liria e medias është në rrezik për shkak të një sërë faktorësh, përfshirë këtu ndikimi nga pronarët e mediave që mund të kenë lidhje me qeverinë ose opozitën, ose kërcënimi nga bota e krimit. Një mosrespektim ndaj figurës së gazetarit ka shfaqur shpesh herë edhe kryeministri Edi Rama i cili shpesh herë u drejtohet me termin ‘’kazan’’, teks media shihet nga udhëheqësit e zgjedhur në mënyrë demokratike, si kundërshtare ndaj të cilës shfaqin hapur urrejtjen e tyre.
Sot si dita e gazetarëve duhet të shërbejë për t’ua rikujtuar qeveritarëve nevojën e respektimit të përkushtimit të tyre për lirinë e shtypit. Situata e lirisë së shtypit në Shqipëri është përkeqësuar dhe kjo bazohet tek mosndëshkimi për sulmet e kohëve të fundit ndaj gazetarëve, tek politikanët kryesorë që fyejnë dhe shpifin punonjësit e medias dhe tek zyra e kryeministrit dhe kryetarit të Bashkisë Tiranë të cilët refuzojnë qasjen ndaj gazetarëve kritikë.
