Sulmuesi i Chelseat, Romelu Lukaku dëshiron të largohet nga klubi anglez gjatë verës dhe opsionet për të ardhmen nuk i mungojnë. Sulmuesi belg nuk është i kënaqur me paraqitjet e tij që nga rikthimi në Premier League verën e kaluar. 28-vjeçari dëshiron të largohet sapo të hapet merkatoja e verës dhe klubet e interesuara nuk mungojnë.
Megjithatë, sipas faqes Football Italia, preferenca e Lukakut është rikthimi te Interi. Lukaku fitoi Scudetton me Interin sezonin e kaluar, duke luajtur për trajnerin e atëhershëm të Interit, Antonio Conte. Lukaku ka qenë gjithashtu i lidhur me Paris Saint-Germain kohët e fundit, nëse ata do të merrnin Conten si trajner në verë. Burimi vazhdon të thotë se Lukaku do të duhet të ulë ndjeshëm pagën e tij nëse dëshiron të kthehet në Inter, pasi ata mund të paguajnë vetëm gjysmën e asaj që ai fiton aktualisht në Chelsea.
