Në datë 15 prill në Portin e Durrësit humbi jetën në mënyrë tragjike një punëtor 19-vjeçar dhe kjo për shkak të papërgjegjshmërisë së punëtorëve të portit. I riu u tërhoq zvarrë nga vinçi duke gjetur vdekjen. Për tragjedinë në fjalë është vendosur masa “Arrest me burg” për 3 punonjësit e portit të cilët akuzohen për “shkelje të rregullave të mbrojtjes në punë”, ku për pasojë humbi jetën 19 vjeçari Rufan Belshaku.
Më konkretisht gjyqtari i kësaj çështje ka vendosur arrest me burg për Rendi Biçaku, 27 vjeç, me funksion përgjegjës turni, në firmën përpunimit të kontenierëve në portin e Durrësit, Nazmi Varaku, 64 vjeç, me funksion manovrator i makinerisë dhe Bledar Troplini, 42 vjeç, me funksion kryemekanik i ofiçinës. Shtetasit në fjalë akuzohen se nuk kanë respektuar rregullat e mbrojtjes në punë, në vendin e quajtur “Sheshi i Kontenierëve” në firmën përpunimit të kontenierëve në portin e Durrësit.
Kujtojmë se i ndjeri Rufan Belshaku u aksidentua për vdekje, nga një mjet pune i kësaj firme, që po drejtohej nga shtetasi Nazmi Varaku.
