Blendi Gonxhja me sa duket nuk di të ndalet. Pas rasteve të shumta të paraqitura në lidhje me tenderat e dyshimtë të organizuar nga DPSHTRR, një tjetër rast i shtohet listës së gjatë. Rezulton se Gonxhja ka nevojë të mirëmbajë chiller-at dhe gjeneratorët e DPSHTRR Tiranë. Për këtë duket se gjithçka është parapërgatitur dhe se fituesi është paracaktuar.
Themi kështu pasi në garë rezulton se kanë marrë pjesë vetëm dy kompani. Tenderi në fjalë mban numrin e referencës REF-67561-08-03-2020 dhe objekti i tij është “Mirembajtje chiller dhe gjenerator te DRSHTRR Tirane”. Kompanitë pjesëmarrëse në të ashtuquajturën garë, kanë qenë dy, përkatësisht “CLIMACASA” SHPK me vlerë të ofruar 2.399.850 lekë pa TVSH dhe SULOLLARI-KLIMA e cila nuk ka paraqitur fare ofertë.
Që këtu lind dyshimi i parë. Pasi në një garë të gjitha kompanitë që hyjnë, paraqesin ofertën e tyre. Sepse nëse nuk e paraqesin, çfarë kuptimi ka të marrin pjesë? Me sa duket firma në fjalë ka marrë pjesë “sa për numër” në mënyrë që tenderi të duket në pamje të parë si i rregullt. Rrjedhimisht fitues është shpallur e vetmja kompani që ka paraqitur ofertë, pra pikërisht “CLIMACASA” SHPK me rreth 29 milionë lekë të vjetra me TVSH.
Dyshimi i dytë lind tek diferenca mes fondit limit dhe vlrerës së ofruar nga fituesi. Kjo diferencë është vetëm 950 mijë lekë të vjetra ose ndryshe kompania fituese ka fituar me një vlerë prej gati 96,18% të fondit limit. Kjo do të thotë që fituesi është i ditur dhe se një pjesë e parave të tenderit do të përfundojnë në xhepat e organizatorëve. Bukur Blendi, apo jo?
