Është konfirmuar mëngjesin e sotëm rasti i parë me koronavirus edhe te skuadra e Barcelonës. Spanja është një nga vendet më të prekura ditët e fundit nga kjo epidemi dhe rastet sa vjen e shtohen.
Mediat spanjolle kanë raportuar sot se drejtori i shërbimeve mjekësore të Barcelonës, Ramon Canal, ka dalë pozitiv në testin për koronavirus.
Gjithashtu, pozitiv ka rezultuar edhe një tjetër anëtar i stafit mjekësor në sektorin e hendbollit te Barcelona.
Për fatin e mirë, të dy janë në gjendje të qëndrueshme dhe po kurohen në spital, ku nuk shfaqin simptoma të rënduar. I gjithë stafi dhe ekipi katalanas do të jetë në izolim dhe mbikqyrje të veçantë për ditët në vazhdim.