Verona mundi mbrëmjen e djeshme 2-1 Juventusin. Goli vendimtar i fitores historike të Veronës kundër Juventusit erdhi për meritë dhe të mbrojtësit të Shqipërisë, Marash Kumbulla.
Gjatë goditjes së këndit në minutën e 85-ë për Veronën, Kumbulla, goditi topin me kokë drejt portës së mbrojtur nga Shezni.
Në këtë moment, kapiteni i Juventusit Leonardo Bonuçi bën gabimin fatal duke prekur topin me dorë.
Pamjet e VAR-it e penalizuan Bonuçin me karton të verdhë dhe penallti. Ish-sulmuesi i Milanit dhe Interit, Pacini u tregua i saktë nga 11 metra distancë duke i dërguar kampionët e Italisë në shtëpi duarbosh dhe kokëulur.
Kumbulla vazhdon të konfirmohet si njëri prej mbrojtësve me të ardhme premtuese jo vetëm në Itali, por dhe në Europë.
Shumë klube të mëdha europiane si: Inter, Borusia Dortmund, Mançester Siti, Çelsi, Eintrahti i Frankfurti po ndjekin prej kohësh Kumbullën në paraqitjet e tij.