Debati me drejtorin, Eric Abidal, e lidh Lionel Messin me një largim të mundshëm nga Barcelona. Më 25 nëntor 2017 Lionel Mesi firmoste deri në vitin 2021 me katalanasit, me klauzolën që ndryshoi nga 250 në 700 milionë euro për prishjen e kontratës, por sot kjo shifër tani nuk tremb askënd.
Kjo pasi në kontratë ekziston edhe një klauzolë tjetër, e cila i lejon argjentinasit të largohet me parametër zero, nëse lajmëron për t’u transferuar në një klub tjetër, 30 ditë përpara startit të sezonit. Dhe kaq ka mjaftuar që ujërat të turbullohen…
Në Europë duket se janë vetëm 5 klube që mund t’ia lejojnë vetes të paguajnë Lionel Messin. Manchester United, PSG, Manchester City, Juventusi apo dhe Interi, do ishin gati të bënin çmendurira për futbollistin argjentinas.
Por sa do t’u kushtonte afrimi i Leos 5 ekipeve të mësipërme? Përgjigjja është: Nga 50 deri në 85 milionë euro në vit. Baza e pagës është 50 milionë euro neto në sezon. Ndërkohë, një bonus i veçantë është ai prej 25 milionë eurosh në rast suksesi të Champions-it, i cili mund të përballohet nga të gjitha klubet e mësipërme.
Por nëse këtu fusim edhe taksat, kostoja totale për të afruar Mesin në skuadër mund të prekë tavanin e 85 milionë eurove neto në vit, ndonëse falë imazhit dhe sponsorëve që Mesi do të afronte, asnjë shpenzim nuk duket i tepruar për 32-vjeçarin.