De Ligt duket se nuk po arrin dot të ambientohet te Juventusi dhe vijon të jetë në qendër të kritikave. Duke parë këtë situatë, Ajaxi po shqyrton mundësinë e rikthimit në skuadër të ish kapitenit të tyre.
Lajmin e konfirmon gazeta portugeze ‘A Bola’. Kampionët holandezë verën e kaluar e shiten De Ligtin te Juventusin për 86 milionë euro, por 20 vjeçari nuk ka arritur të justifikojë shumën e madhe të paguar për të.
Ai nuk ka arritur të përfshihet në skemat e trajnerit Maurizio Sarri, ndërsa në dy ndeshjet e fundit ka humbur edhe vendin e titullarit, duke u zëvendësuar nga turku Merih Demiral, që po kalon në super formë.
Është tani Ajaxi që po kërkon rikthimin e tij në skuadër, me një huazim të mundshëm deri në fund të sezonit. Ajaxi ka nevojë për një lojtar në qendër të mbrojtjes pas lëndimit të Daley Blind dhe rikthimi i De Ligt është mundësi reale.
