Teksa lotët rridhnin në sytë e të gjithëve në Kishë, një vajzë e vogël e guximshme i ktheu buzëqeshjen me veprimin e saj. Charlotte O’Dwyer është shumë e re për të kuptuar se nuk do ta shohë më kurrë babain e saj Andrew. Ai nuk do të jetë pranë saj në ditën e parë apo të fundit të shkollës, as të ecë me të drejt altarit në ditën e martesës.
Vogëlushja do të rritet pa babain, për të cilin të gjithë njerëzit do t'i thonë se ishte hero. 36-vjeçari zjarrfikës dhe kolegu i tij Geoffrey Keaton u vranë më 19 dhjetor, kur automjeti në të cilin ndodheshin u rrotullua dhe u përplas me një pemë. Ata kishin shkuar për të luftuar zjarret në Buxton, në jug të Sidneit.
Ndërsa të tjerët po dëgjonin për përpjekjet heroike të zotit O’Dwyer në atë natë fatale, Charlotta e vogël mori helmetën e babait dhe pranoi një medalje të shërbimit RFS, të cilën e kishte marrë pas vdekjes. Pak minuta më vonë, ajo u ul në tokë, poshtë arkivolit të babait duke ngrënë një pako patatina e duke sjellë buzëqeshje në fytyrat e të tjerëve.
Pafajësia e saj ktheu buzëqeshjen tek të tjerët që harruan për disa çaste pikëllimin. Babai i saj dhe mijëra zjarrfikës të tjerë kanë luftuar shumë gjatë muajve të fundit për të mbrojtur Australinë nga zjarret.
***
Burim: DailyMail|Përktheu dhe përshtati: JOQ Albania
