Një shpërthim i fuqishëm ndodhi mbrëmjen e sotme në një pikë karburanti në Tiranë.
Incidenti i rëndë ndodhi në zonën e Kombinatit, rreth orës 18:46, në rrugën "Llazi Miho", ku një karburant shpërtheu dhe mori flakë një bombol gazi, që shërbente për furnizimin me gaz të automjeteve.
Policia raportoi se nuk ka persona të lënduar nga shpërthimi por vetëm dëme materiale, ndërkohë që forcat zjarrfikëse bënë të mundur fikjen e flakëve.
Ndërkohë një dëshmitar në vendngjarje ka dërguar një mesazh në redaksinë e JOQ Albania, ku tregon momentin e shpërthimit dhe pasojat që la pas.
Sipas tij, shpërthimi ka qenë aq i fortë saqë e ka shtyrë mbi 10 metra matanë rrugës një automjet tip "Ford Focus", që po kalonte aty pranë.
Qytetari rrëfen se njerëzit që ndodheshin brenda në automjet, ndër ta edhe fëmijë, dolën me shpejtësi jashtë.
Ai thekson se disa sekonda më pas shpërtheu kofanoja e makinës.
Më tej qytetari shprehet se edhe dy kamiona që po kalonin rastësisht aty pranë, janë prekur nga rrezja e shpërthimit dhe nuk mund të ndizen dot më, pasi u është dëmtuar motori.
Ndonëse policia raportoi se nuk ka persona të lënduar, sipas qytetarit një person ka mbetur i plagosur dhe është dërguar drejt spitalit për ndihmë mjekësore.
Mesazhi i plotë:
Njoftimi i policisë:
Rreth orës 18:46 në rrugën “Llazi Miho”, në një karburant, ka shpërthyer dhe ka marrë flakë një bombol gazi që shërbente për furnizimin me gaz të automjeteve ku si pasojë ka veç dëme materiale.
Menjëherë pas njoftimit të marrë për ngjarjen, forca të shumta policie dhe disa zjarrfikëse shkuan në vendngjarje, ku Zjarrfikëset po bëjnë të mundur fikjen e plotë të zjarrit duke shmangur plotësisht rrezikun e përfshirjes së mëtejshëm të tij.
Policia mori masa duke vendosur perimetrin e sigurisë e largimin e të gjithë qytetarëve nga perimetri i sigurisë, si dhe bllokimin e aksit rrugor duke i menaxhuar e drejtuar për në akse të tjera lëvizjeje.
Paraprakisht, dyshohet se ngjarja ka qenë aksidentale, ndodhur nga një defekt teknik në sistemin e gazit.
Grupi hetimor ndodhet në vendngjarje, ku po vijon punën për sqarimin e plotë të rrethanave të ngjarjes për hetimin e plotë të rrethanave të ngjarjes.