Te Juventusi ka një çështje dhe ajo quhet "Cristiano Ronaldo". Ylli portugez ka një krisje me trajnerin Sarri, pasi ky i fundit e ka zëvendësuar në dy ndeshjet e fundit.
Tifozët janë në dilemë se anën e kujt të mbajnë, pasi sigurisht nuk mund të bëjnë me faj dhe aq lehtë një futbollist si Ronaldo.
Por, nëse i hedhim një sy historisë, fakt është se kjo nuk është përplasja e parë e Ronaldos me një trajner.
Trajneri i parë që u bë "viktimë" e nervozizmit të Ronaldos është Karlos Keiroz, ish-trajneri i Portugalisë. Gjatë Botërorit 2010, luzitanët u eliminuan në 1/8-at e finaleve nga Spanja.
Pas daljes nga fusha, gazetarëve që e pyesnin për arsyet e disfatës, Ronaldo u shpreh ftohtë, egër dhe qartë: “Pyesni Keirozin”.
Nga ai moment, marrëdhënia mes CR7-ës dhe trajnerit ka ngrirë përfundimisht. Gjithsesi, edhe më e paharrueshme do të jetë përplasja mes Kristiano Ronaldos dhe Zhoze Murinjos, në periudhën e Realit të Madridit, ndonëse zjarri u ndez në dopiosfidën deçizive ndaj Barcelonës, në gjysmëfinalet e Champions-it të vitit 2011.
Pas ndeshjes së vajtjes, të luajtur në “Santiago Bernabeu”, Kristiano kishte shprehur hapur pakënaqësinë për skemat ultrambrojtëse të urdhëruara nga portugezi ndaj skuadrës.
Por Murinjo, edhe pse nuk u përgjigj me zë, e bëri me vepra, duke e ulur në stol sulmuesin në ndeshjen e radhës në kampionat ndaj Saragozës.
Për të qëndruar te Reali i Madridit, mund të përmendet edhe mardhënia mjaft e ftohtë me Rafa Benitezin gjatë 4 muajve që ai drejtoi klubin spanjoll ku ishte pjesë edhe Ronaldo.
