"Arena Kombëtare" ka hapur sot dyert për herë të parë, ku prej orës 19:00 po zhvillohet ndeshja testuese mes skuadrave të Apolonisë dhe Vllaznisë për femra.
Ndeshja testuese po ndiqet edhe nga zyrtarët e UEFA-s.
Ndonëse ishte premtuar se gjithçka do të ishte gati për ndeshjen kundër Francës, disa foto nga stadiumi i ri, i cili do të quhet "Air Albania", dëshmojnë të kundërtën.
Siç shihet nga disa foto të realizuara në ambientet e impiantit të ri, të ndërtuar në gërmadhat e stadiumit "Qemal Stafa", mungojnë tabelat orientuese, si dhe ka ende punime të papërfunduara në brendësi.
Këto probleme vënë në pikëpyetje nëse ndeshja me Francën në 17 nëntor do të zhvillohet apo jo tek "Arena Kombëtare".
Heqja nga stadiumi e emrit Qemal Stafa, heroit i cili dha jetën për atdheun, për t'i vënë emrin "Air Albania", ka revoltuar shqiptarët, të cilët e konsiderojnë këtë vendim të turpshëm.