Kosova ka zhvilluar një ndeshje të madhe dhe fantastike mbrëmjen e sotme përballë Anglisë në "St. Mary Stadium", ku janë shënuar plot 8 gola.
Ndonëse u mposhtën me rezultatin 5-3, dardanët treguan shpirtin e tyre luftarak dhe nuk u dorëzuan asnjë sekond të ndeshjes.
Vetëm 35 sekonda lojë iu deshën Kosovës për të shënuar golin e parë, duke shtangur kombëtaren e "Tre Luanëve".
Por britanikët e përmbysën shpejt rezultatin.
Fillimisht Rahim Sterling barazpeshoi shifrat në minutën e 8-të të ndeshjes, ndërsa 11 minuta më pas Harry Kane ktheu në avantazh anglezët.
Një autogol i Mërgm Vojvodës dhe dy gola të shpejtë të Jadon Sancho në fundin e pjesës së parë vulosën shifrat 5-1 për episodin e parë të ndeshjes.
Atëherë kur të gjithë menduan se Kosova u dorëzua përballë furisë angleze, sërish Valon Berisha 4 minuta nga nisja e fraksionit të dytë të sfidës shënoi golin e dytë për dardanët.
Vetëm 6 minuta më pas Vedat Muriqi çoi në peshë zemrat e tifozëve të dardanëve duke shënuar me penallti golin e tretë për Kosovën.
Në minutën e 65-të, portieri Muriç bëri mrekullinë duke pritur penalltinë kapitenit të anglezëve, Harry Kane, të cilit i kuptoi krahun.
Pavarësisht përpjekjeve të kosovarëve për të shënuar sërish, rezultati mbeti i pandryshuar deri në fishkëllimën e fundit të arbitrit.
Një paraqitje dinjitoze për kosovarët, të cilët pasi mposhtën Republikën Çeke në shtëpi me rezultatin 2-1, treguan dhe njëherë që janë një "kockë e fortë" për t'u kaluar, edhe nga ekipet e mëdha.
Pas kësaj ndeshje Kosova zbret në vendin e tretë në renditje, pasi çekët fituan ndaj Malit të Zi me rezultatin 0-3 sot në mbrëmje.
***
Për t’u bërë pjesë e grupit mjafton të klikoni: Join Group dhe kërkesa do t’ju aprovohet. KOMUNITETI JOQ ALBANIA: https://m.facebook.com/groups/komunitetiJOQ/