Një ngjarje e rëndë ndodhi dje në Tiranë, ky dy punonjës ndërtimi humbën jetën dhe tre të tjerë mbetën të lënduar, pasi ranë nga skela ku po punonin për rikonstruktimin e një fasade pallati.
Ndonëse dy bij nënash u larguan nga kjo jetë, për shkak të mungesës së kushteve teknike në vendin e punës, ende nuk ka pasur asnjë reagim nga kryebashkiaku Erion Veliaj dhe nga Kryeministri Edi Rama.
Moskokëçarja e kreut të qeverisë dhe kryebashkiakut të Tiranës lidhur me këtë ngjarje ka shkaktuar reagime të shumta në mbarë opinionin publik, ndër ta edhe aktivisti i njohur Pano Soko.
Përmes një statusi në "Facebook", Soko vë theksin tek dy jetët e humbura dhe se dikush duhet të mbajë përgjegjësi për këtë ngjarje të rëndë, ndërsa ironizon deklaratat e shtypit që publikohen nga zyra e Veliajt dhe Ramës.
Postimi i plotë:
Bashkia Tiranë përuroi sot rrugën Bla-bla. Plot 48 metra afalt që do të lidhin një cep pallati me cepin tjetër. Ka dhe 3 poça dhe 4 pemë. Mori pjesë Kryetari i Bashkisë dhe deputeti i zonës, i cili mbajti fjalimin “Gjithë vëmendjen për ju.." – Jo. Në fakt dje dy djem të rinj vdiqën, sepse askush nga Bashkia nuk e rruan për sigurimin teknik, në projektet e saj për fasadat. Ndonjë llaf..? “Kryeministri publikoi një deklaratë ku thumboi Presidentin…e tërci e vërci.”– Po ndonjë fjalë për ata të dy se ishin djem nënash dhe ata…apo s’..? “U prezantua në photoshop projekti për rrugën… ” “Së shpejti do fillojnë punimet në aksin.. ”, “17 milionë turistë pritet të vizitojnë Shqipërinë”, “U lye korridori i spitalit të Beratit.. me ngjyrë rozë”. “Vazhdojnë mbjelljet e pemëve në pyllin orbital.. ”, “Tirana u shpall kryeqyteti më i gjelbëruar në Rrugën e Qumështit..”
– Ooo kanë kanë humbur jetë dy djem të rinj. Ooo humbën jetën dy njerëz, sepse është kthyer Shqipëria në një treg skllevërish, ku vde.kjet i duhen vetëm Ministrisë për statistikë.
“Mirëseerdhët në Liberìnë e mesit të Europës. Ju lutemi vizitorëve mos i ngacmoni skllevërit kur janë në habitatin e tyre natyral.
Ndalohet hedhja e ushqimit!” – Ooo…Ishin dy njerëz që thjesht po shkonin të punonin. Dikush do mbajë përgjegjësi ndonjëherë në këtë vend???
Ooo.. “Blini produktet Delimano. Dysheku Dormeo me 4 shtresa karboni të jep dhe një jastik falas.. Mos ngurroni, na telefononi tani..”
