Drama jetësore e të rinjve shqiptar, me diploma pa punë dhe në rrugë

Prej vitesh të rinjtë shqiptarë janë duke u përballur me një tragjedi. E themi këtë pasi edhe pse kanë një diplomë dhe i kanë mbaruar studimet me rezultate të larta ata janë pa punë.

Sipas ekspertëve në Shqipëri mungojnë studimet për tregun e punës. Në vendin tonë të kesh një diplomë, apo edhe të kesh mbaruar me rezultate të larta nuk do të thotë asgjë.

Bëhet e ditur se papunësia e shqiptarëve me arsim të lartë është luhatur nga 18 – 21% përgjatë 3 viteve të fundit.

Linda Pino, eksperte e arsimit për Tv Klan ka thënë:

Ne nuk kemi këshillim karriere që në hapat e para të arsimit, pra që ata me rezultate të ulëta t’i orientojnë drejt arsimin profesional. Apo edhe në gjimnaz, këshillimin e bën një person që ka më pak orë mësimore. Nuk është bërë një studim për tregun e punësimit në Shqipëri. Me të dhëna zyrtare nga Instati, nga 23% që është popullsia e të rinjve në Shqipëri, 22.2% janë të papunë, atëherë ku i ka orientuar shteti shqiptar politikat e punësimit?!’’

Kjo gjë mbetet një dramë jo vetëm e të rinjve shqiptar, por e gjithë shoqërisë sonë. Jo më kot edhe gjatë viteve të fundit është shtuar në masë largimi i të rinjve nga vendi. Kryesisht po largohen drejt Gjermanisë, pasi aty e kanë më të lehtë të gjejnë një vend pune se sa në Shqipëri.